ਓਟਾਵਾ: ਕੈਨੇਡਾ ਸਰਕਾਰ ਨੇ ਅਸਥਾਈ ਰਿਹਾਇਸ਼ (Temporary Resident) ਪ੍ਰੋਗਰਾਮ ਨੂੰ ਹੋਰ ਮਜ਼ਬੂਤ ਬਣਾਉਣ ਅਤੇ ਦੇਸ਼ ਦੀਆਂ ਰੁਜ਼ਗਾਰ ਲੋੜਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ Open Work Permit (OWP) ਨਾਲ ਜੁੜੇ ਨਿਯਮਾਂ ਵਿੱਚ ਵੱਡੇ ਬਦਲਾਅ ਕੀਤੇ ਹਨ। Immigration, Refugees and Citizenship Canada (IRCC) ਵੱਲੋਂ ਜਾਰੀ ਨਵੇਂ ਨਿਯਮ 21 ਜਨਵਰੀ 2025 ਤੋਂ ਲਾਗੂ ਹੋ ਗਏ ਹਨ।
ਹੁਣ ਕਿਨ੍ਹਾਂ ਨੂੰ ਮਿਲੇਗਾ Family Open Work Permit?
ਨਵੇਂ ਨਿਯਮਾਂ ਅਨੁਸਾਰ ਹੁਣ ਹਰ ਅੰਤਰਰਾਸ਼ਟਰੀ ਵਿਦਿਆਰਥੀ ਜਾਂ ਵਿਦੇਸ਼ੀ ਕਰਮਚਾਰੀ ਦੇ ਜੀਵਨ ਸਾਥੀ ਨੂੰ Open Work Permit ਨਹੀਂ ਮਿਲੇਗਾ।
ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ
Family Open Work Permit ਸਿਰਫ਼ ਉਨ੍ਹਾਂ ਦੇ ਜੀਵਨ ਸਾਥੀਆਂ ਲਈ ਉਪਲਬਧ ਹੋਵੇਗਾ ਜੋ:
- ਘੱਟੋ-ਘੱਟ 16 ਮਹੀਨੇ ਜਾਂ ਇਸ ਤੋਂ ਵੱਧ ਮਿਆਦ ਵਾਲੇ ਮਾਸਟਰਜ਼ ਪ੍ਰੋਗਰਾਮ ਵਿੱਚ ਪੜ੍ਹ ਰਹੇ ਹਨ।
- ਡਾਕਟਰੇਟ (PhD) ਪ੍ਰੋਗਰਾਮ ਵਿੱਚ ਦਾਖਲ ਹਨ।
- ਸਰਕਾਰ ਵੱਲੋਂ ਮਨਜ਼ੂਰ ਕੀਤੇ ਕੁਝ ਪੇਸ਼ੇਵਰ (Professional) ਜਾਂ ਹੋਰ ਯੋਗ ਕੋਰਸਾਂ ਵਿੱਚ ਪੜ੍ਹਾਈ ਕਰ ਰਹੇ ਹਨ।
ਵਿਦੇਸ਼ੀ ਕਰਮਚਾਰੀਆਂ ਲਈ ਨਵੇਂ ਨਿਯਮ
ਵਿਦੇਸ਼ੀ ਕਰਮਚਾਰੀਆਂ ਦੇ ਜੀਵਨ ਸਾਥੀ ਨੂੰ Family Open Work Permit ਤਾਂ ਹੀ ਮਿਲੇਗਾ ਜੇ ਮੁੱਖ ਅਰਜ਼ੀਕਾਰ:
- TEER 0 ਜਾਂ TEER 1 ਸ਼੍ਰੇਣੀ ਦੀ ਨੌਕਰੀ ਕਰ ਰਿਹਾ ਹੋਵੇ, ਜਾਂ
- ਸਰਕਾਰ ਵੱਲੋਂ ਤਰਜੀਹ ਵਾਲੇ ਜਾਂ ਮਜ਼ਦੂਰਾਂ ਦੀ ਘਾਟ ਵਾਲੇ TEER 2 ਜਾਂ TEER 3 ਪੇਸ਼ਿਆਂ ਵਿੱਚ ਕੰਮ ਕਰ ਰਿਹਾ ਹੋਵੇ।
ਇਨ੍ਹਾਂ ਵਿੱਚ ਮੁੱਖ ਤੌਰ ‘ਤੇ ਹੇਠ ਲਿਖੇ ਖੇਤਰ ਸ਼ਾਮਲ ਹਨ:
- ਸਿਹਤ ਸੇਵਾਵਾਂ (Health Care)
- ਨਿਰਮਾਣ (Construction)
- ਕੁਦਰਤੀ ਅਤੇ ਲਾਗੂ ਵਿਗਿਆਨ (Natural & Applied Sciences)
- ਕੁਦਰਤੀ ਸਰੋਤ (Natural Resources)
- ਸਿੱਖਿਆ (Education)
- ਖੇਡਾਂ (Sports)
- ਫੌਜੀ ਸੇਵਾਵਾਂ (Military)
ਵਰਕ ਪਰਮਿਟ ਦੀ ਮਿਆਦ ਵੀ ਹੋਵੇਗੀ ਜ਼ਰੂਰੀ
ਜੇ ਵਿਦੇਸ਼ੀ ਕਰਮਚਾਰੀ ਦੇ ਜੀਵਨ ਸਾਥੀ ਨੇ Open Work Permit ਲਈ ਅਰਜ਼ੀ ਦੇਣੀ ਹੈ ਤਾਂ ਮੁੱਖ ਅਰਜ਼ੀਕਾਰ ਦੇ ਵਰਕ ਪਰਮਿਟ ਦੀ ਮਿਆਦ ਵਿੱਚ ਘੱਟੋ-ਘੱਟ 16 ਮਹੀਨੇ ਬਾਕੀ ਹੋਣੇ ਚਾਹੀਦੇ ਹਨ।
ਬੱਚਿਆਂ ਲਈ ਕੀ ਬਦਲਿਆ?
ਨਵੇਂ ਨਿਯਮਾਂ ਤਹਿਤ ਵਿਦੇਸ਼ੀ ਕਰਮਚਾਰੀਆਂ ਦੇ ਆਸ਼ਰਿਤ ਬੱਚੇ (Dependent Children) ਹੁਣ Family Open Work Permit ਲਈ ਯੋਗ ਨਹੀਂ ਰਹਿਣਗੇ।
ਪਹਿਲਾਂ ਜਾਰੀ ਹੋਏ ਪਰਮਿਟ ਰਹਿਣਗੇ ਵੈਧ
IRCC ਨੇ ਸਪੱਸ਼ਟ ਕੀਤਾ ਹੈ ਕਿ ਜਿਹੜੇ Open Work Permit ਪਹਿਲਾਂ ਦੇ ਨਿਯਮਾਂ ਅਧੀਨ ਜਾਰੀ ਹੋ ਚੁੱਕੇ ਹਨ ਅਤੇ ਅਜੇ ਵੀ ਵੈਧ ਹਨ, ਉਨ੍ਹਾਂ ‘ਤੇ ਇਸ ਬਦਲਾਅ ਦਾ ਕੋਈ ਅਸਰ ਨਹੀਂ ਪਵੇਗਾ।
ਜੇ ਵਿਦਿਆਰਥੀ ਨੂੰ ਆਪਣੀ ਪੜ੍ਹਾਈ ਪੂਰੀ ਕਰਨ ਲਈ ਹੋਰ ਸਮਾਂ ਚਾਹੀਦਾ ਹੈ ਜਾਂ ਪਰਿਵਾਰਕ ਮੈਂਬਰ ਦਾ ਪਰਮਿਟ ਮੁੱਖ ਅਰਜ਼ੀਕਾਰ ਨਾਲੋਂ ਘੱਟ ਮਿਆਦ ਲਈ ਜਾਰੀ ਹੋਇਆ ਸੀ, ਤਾਂ ਉਹ ਕੈਨੇਡਾ ਦੇ ਅੰਦਰ ਰਹਿੰਦੇ ਹੋਏ ਨਵੀਨੀਕਰਨ (Renewal) ਲਈ ਅਰਜ਼ੀ ਦੇ ਸਕਦੇ ਹਨ, ਬਸ਼ਰਤੇ ਉਹ ਪਹਿਲਾਂ ਵਾਲੀਆਂ ਹੀ ਯੋਗਤਾ ਸ਼ਰਤਾਂ ਪੂਰੀਆਂ ਕਰਦੇ ਹੋਣ।
ਕਿਨ੍ਹਾਂ ‘ਤੇ ਇਹ ਨਿਯਮ ਲਾਗੂ ਨਹੀਂ ਹੋਣਗੇ?
ਇਹ ਬਦਲਾਅ ਹੇਠ ਲਿਖੇ ਲੋਕਾਂ ‘ਤੇ ਲਾਗੂ ਨਹੀਂ ਹੋਣਗੇ:
- ਮੁਕਤ ਵਪਾਰ ਸਮਝੌਤਿਆਂ (Free Trade Agreements) ਤਹਿਤ ਆਏ ਵਰਕਰ।
- ਉਹ ਵਿਦੇਸ਼ੀ ਨਾਗਰਿਕ ਜੋ ਸਥਾਈ ਰਿਹਾਇਸ਼ (Permanent Residency) ਵੱਲ ਬਦਲ ਰਹੇ ਹਨ।
ਜੇ ਕੋਈ ਪਰਿਵਾਰਕ ਮੈਂਬਰ Family Open Work Permit ਲਈ ਯੋਗ ਨਹੀਂ ਰਹਿੰਦਾ, ਤਾਂ ਉਹ ਕੈਨੇਡਾ ਦੇ ਹੋਰ ਉਪਲਬਧ ਵਰਕ ਪਰਮਿਟ ਪ੍ਰੋਗਰਾਮਾਂ ਤਹਿਤ ਅਰਜ਼ੀ ਦੇ ਸਕਦਾ ਹੈ।
ਸਰਕਾਰ ਦਾ ਮਕਸਦ
ਕੈਨੇਡਾ ਸਰਕਾਰ ਦਾ ਕਹਿਣਾ ਹੈ ਕਿ ਇਨ੍ਹਾਂ ਬਦਲਾਵਾਂ ਦਾ ਉਦੇਸ਼ ਇਮੀਗ੍ਰੇਸ਼ਨ ਪ੍ਰਣਾਲੀ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਣਾ, ਅਸਥਾਈ ਰਿਹਾਇਸ਼ੀ ਪ੍ਰੋਗਰਾਮਾਂ ਦੀ ਭਰੋਸੇਯੋਗਤਾ ਕਾਇਮ ਰੱਖਣਾ ਅਤੇ ਮਜ਼ਦੂਰਾਂ ਦੀ ਅਸਲ ਲੋੜ ਵਾਲੇ ਖੇਤਰਾਂ ਨੂੰ ਤਰਜੀਹ ਦੇਣਾ ਹੈ।